Insgesamt liewen den Moment +/- 1,079 Milliounen Awunner zu Köln, dovunner sinn ongefeier 106.500 Studenten, an dodrënner ginn et eng ronn 400 Lëtzebuerger. D’Distanz vun der Stad Lëtzebuerg bis op Köln leit bei 200 km an et brauch een mam Auto 2, bis 2 an eng hallef Stonn.

Köln

Insgesamt liewen de Moment +/- 1,086 Milliounen Awunner zu Köln, dovunner sinn ongeféier 103.300 Studenten, dovunner iwwer 500 Lëtzebuerger. D’Distanz vun der Stad Lëtzebuerg bis op Köln leit bei 200 km an et brauch ee mam Auto 2 – 2 ½ Stonn.

Wunnen:

Den LSC huet säit 2016 eng eege Facebook-Grupp, fir d’Wunnengssich fir déi nei Lëtzebuerger Studenten ze erliichteren: „Wunnengssich (LSC)“. Hei ka jiddereen, deen op der Sich no enger neier Wunneng ass, oder seng al Wunneng weider verloune well, ee Beitrag posten. Ausserdeem verkafen hei vill Leit hier al Miwwelen zu engem gudde Präis. Weider Méiglechkeete fir eng Wunneng ze fanne sinn iwwer Internetsäiten (immobilienscout24.de), Annoncen un der Uni/Héichschoul, Makleragenturen, Dageszeitungen an iwwer d’Studentenwerk (des Wunnenge si ganz gënschteg, et ass awer mat laange Waardezäiten ze rechnen, d’Adress ass: Kölner Studentenwerk, Universitätsstraße 16, 50937 Köln; www.kstw.de). Wann‘s du op der Sich no engem WG-Zëmmer bass, kanns de och bei www.wg-gesucht.de nokucken. 

Déi typesch Stundentewunnvéierelen zu Köln si Sülz, Lindenthal, Klettenberg, Belgisches Viertel, Zollstock an Ehrenfeld. Et ass natierlech ëmmer vu Virdeel wann dir eng gutt Bunn- oder Busverbindung an den Zentrum, oder op déi Uni/Héichschoul un der dir studéiere wëllt, hutt. Fir eng Wunneng ab 30 m² zu Köln muss ee mat mindestens 500-600€/Mount rechnen.

Typesch Köln:

Wann een u Köln denkt, fält engem natierlech direkt de Kölner Dom an. Dobäi nennen d’Studente Köln net ëmsoss „Cöllefornia“, d’Stad huet nämlech e gutt Stéck méi ze bidden. An der Alstad kann een en erfrëschende Kölsch drénken an dobäi déi wonnerschéin Aussiicht op de Rhäin genéissen. D’Hohe Straße, d’Schildergasse, d’Breite Straße an d’Ehrenstraße luede fir ze shoppen an. D’Kulturliebhaber kënne vun de ville Muséeën, Theateren an Opere profitéieren. Et feelt der Stad och net u grénge Flächen, wann een d’Natur also gär huet, kënnt ee mat ville Parks, Bëscher a Weieren och op seng Käschten. Sportfans ginn zu Köln natierlech regelméisseg vum 1.FC Köln, mee och vun eiser Äishockey Mannschaft, de Kölner Haie, entertained. An op kee Fall duerf een d’Lieblingszäit vum Kölner, déi fënneft Joereszäit verpassen! Ëm Karneval, mee och den 11.11, herrscht an der ganzer Stad Ausnamezoustand.

Iessen an Drénken:

Mir Studente feieren am léifsten an de Knäipen an Discoen an der Géigend vun der Zülpicher Straße an de Ringen. Mee och am Belgischen Viertel, zu Ehrenfeld, an der Südstadt an an der Alstad ginn et vill Méiglechkeeten, ee lëschtegen Owend ze verbréngen an et fënnt een a ganz Köln Restauranten, déi fir wéineg Sue leckert Iessen ubidden.

Transport:

Leider kënnt ee mam Auto nach ëmmer am séiersten an am bëllegsten op Köln (2-2 ½ Stonnen). Den Zuch ass net immens gënschteg a brauch mindestens eng Stonn méi laang (+/- 3 ½ Stonnen). Wann‘s du keen Auto besëtz, kanns du dech beim LSC mellen, fir eng Matfuergeleeënheet ze fannen. Op Facebook gëtt et eng extra Grupp dofir (Matfuergeleeënheet Köln <—> Letz).

Ënnerhalb vun der Stad kënnt een am séierste mat der Bunn vun A op B. All Student op der Universitéit zu Köln oder och op verschiddenen aneren Héichschoulen, kréie beim Bezuele vum Semesterbäitrag ee Semesterticket ausgestallt, mat deem en d’Busser, d’Bunnen, d’S-Bahn an d’Regionalbahn a ganz Nordrhein-Westfalen benotze kann. Ausserdeem ass d’Vëlofuere bei de Studenten zu Köln ganz beléift.

Ëmweltplakette:

Virun denger Urees op Köln solls de dir am Beschten eng Ëmweltplaquette fir däin Auto besuergen, falls du domat a Köln erafuere wëlls. Déi kanns du an Däitschland bei all TÜV kafen oder um Site vum ACL bestellen andeems du deng „Gro Kaart“ vum Auto virweise kanns. D’Plaquette kascht 15€ beim ACL (7,50€ fir Memberen) a 17,50€ beim däitschen TÜV. Beim ACL dauert et bis zu 10 Schaffdeeg bis een se huet. Beim TÜV kritt een se direkt op der Platz ausgestallt.